Jowhar Waxaa Degmada Jowhar ee xarunta gobolka Shabeellada Dhexe lagu soo gunaanaday doorashada xlidhibaan ka tirsan golaha baarlamaanka federaalka Somalia, kaasoo ay ku tartmeen lix musharrax.

Doorashadan oo billaabatay duhurnimadii maanta ayaa waxaa ku tartamay musharraxiinta kala ah;

1. C/llaahi Maxamed Cali [Sanbaloolshe]
   2. Cali C/llaahi Cosoble Siyaad
   3. Daahir C/lle Cawaale,
   4. Nuur Iidow Beyle,
   5. Dahabo Xasan Axmed
   6. Xuseen Axmed Geelle.

Wareeggii koowaad ee doorashada waxaa isugu soo haray C/llaahi Maxamed Cali [Sanbaloolshe] oo helay 24 cod iyo Nuur Iidow Beyle oo helay 23 cod, sidoo kale waxaa hal cod Cali C/llaahi Cosoble, Waxaana xumaatay Saddex cod, ugu dambeyn waxaa wareega labaad u gudbay Sambaloolshe iyo Bayle.

Guddoomiyaha guddiga madaxa-bannaan ee doorashooyinka Marwo Xaliimo Ismaaciil (Xaliimo Yarey) ayaa ku dhawaaqday in kursigan uu ku guuleystay Nuur Iidow Beyle oo helay 27-cod, halka 24-cod helay C/llaahi Maxamed Cali [Sambalooshe].

Dhanka kale, Xarunta Doorashada ay ka dhacaysay waxaa goob-joog ahaa Wasiirka Arrimaha Gudaha Hir-shabeelle, Guddoomiyeyaasha Gobolka iyo Degmada, Mas’uuliyiin iyo xubno ka socda ururrada bulshada rayidka ah.

Madaxweynaha Hir-shabelle Maxamed Cabdi Waare iyo ku xigeenkiisa, Cali Xuseen Guud-laawe ayaa hoolka doorashada soo gaaray markii lasoo gaba-gabeeyay doorashada, laakiinse aan lagu dhawaaqin doorashada.

Ugu dambeyn, Doorashadan oo Maxkamadda sare ee Somalia ay sheegtay in aan la qaban doonin ayaa dhacday, iyadoo aysan jirin wax war ah oo kasoo baxay dhanka Dowladda Federaalka Soomaaliya.

Booliiska magaalada Minneapolis ee dalka Maraykanka ayaa sheegay inay ka hortageen Muuqaalo lagu xusayo haweenay cadaan ah oo uu dilay askari Soomaali ah, sawirkan oo la dhigay goobta dilka ka dhacay ayaa waxaa ka danbeeyey koox Cadaan cunsuriyiin ah oo doonaya inay ka faa’iideystaan dil uu geystay askari Soomaali ah oo ka tirsan booliiska Minneapolis.

15kii bishii July ee sanadkan ayuu Mohamed Nuur oo ah sarkaal ka tirsan Booliiska Minneapolis si kama ah ku dilay haweenay u dhalatay dalka Australia oo lagu magacaabo Justine Ruszczyk Damond.

Baaritaanka kiiskan ayaa socda iyadoo weli aan wax dacwad ah lagu soo oogin Mohamed Nuur oo isagu sheegay inuu haweenaydaasi toogtay kadib markii isaga iyo askarigii la socday ay naftooda u baqeen.

Haweenayda la toogtay oo ahayd cadaan ayaa la sheegay inay iyadu booliiska u yeertay kadib markii sheegtay in gurigeeda agtiisa uu ka dhacday fal danbiyeed, Mohamed Nuur iyo saaxiibkiis askari Matthew Harrity ayaa markii ay goobta gaareen waxay maqleen dhawaaq qarax kadibna waxay arkeen haweenaydan oo gaariga kusoo ordaysa, waa markaas marka uu xabada riday Maxamed Nuur isagoo toogtay haweenaydaasi isagoo gaariga ku dhex jira.

Kiiskan ayaa kusoo beegmay xili dalka Maraykanka ay ka taagneyd xiisad la xariirta dilalka ay askarta booliiska u geystaan dadka madow, balse cunsuriyiinta cadaanka oo iyagu inta badan si adag u difaaca askarta cadaanka ah ayaa doorbiday markan inay cambaareyn iyo eedeyn kala dul dhacaan askariga maadaama uu yahay Madow kasoo jeeda asal ahaan dalka Soomaaliya, uuna dilay haweenay cadaan ah.

Koox cunsuriyiin ah oo la baxay [Identify Evropa] saldhigoodana yahay gobalka Northern California ayaa Jimcihii Sawirka Haweenaydan iyo Shumacyo ka taagay goobta uu dilka ka dhacay si ay markale usoo nooleeyaan xiisada kiiskan. Ciidamada amaanka ee Minneapolis ayaa sheegay inay qaadeen sawirkaasi oo ay kooxdaasi dooneysay inay ka dhigto taalo ay dadka booqdaan, isla markaana sheegay inaan la ogolaan doonin falkan ay ku kaceen kooxdan cadaanka ah.

Waxaa weli taagan kiiska haweenaydan dhimatay iyadoo aan xeer illaalinta weli wax dacwad ah kusoo oogin askari Mohamed Nuur oo isagu diiday inuu wax wareysi ah siiyo xafiiska xeer illaalinta.

Mike Freeman oo ah Xeer illaalinta deegaanka Hennepin County ee Minneapolis ayaa sheegay in kiiskan uu adag yahay maadaama uu Mohamed Nuur diiday inuu hadlo xeer illaalinta ku adkaan doonto inay cadeyso in askarigan uu si bareer ah dilka u geystay ama inuu naftiisa u baqay xiliga ay toogashada dhacday.

Sirdoonka dalka Kenya ayaa sheegay in Xoogagga Al-shabaab ay dajiyeen Qorshayaal halis ah oo dhanka Sirdoonka ah, iyagoo adeegsanaya haween qurux badan.

Joseph Kanyiri oo ka mida saraakiisha Sare ee Kenya ayaa sheegay in Al-shabaab ay diyaariyeen haween ka tirsan kooxda oo aad u qurxoon, kuwaas oo uu sheegay inay geyn doonaan gobolka Somaalidu degto ee Waqooyi-bari Kenya.

Sidoo kale, Joseph ayaa xusay in hablahan ka tirsan Kooxda Al-shabaab ay doonayaan in xariir saaxiibtinimo ay la yeeshaan ciidamada Kenya si ay u helaan xog dhanka sirdoonka ah.

Isagoo sii hadlaya sarkaalkan ayuu sheegay in horay kooxda Al-shabaab ay tallaabadaan oo kale u sameeyeen, isla markaana ay dumar u adeegsadeen basaasnimo si ay gudaha Kenya xog uga helaan.

Dhanka kale, Al-shabaab ayaa weeraro isugu jira qaraxyo iyo mid toos ah ka geystay Gobolka Waqooyi-bari ee Kenya, Waxaana weerarkii ugu saameynta badnaa uu ahaa weerarkii ka dhacay Jaamacadda Gaarisa sanadkii 2015-kii.

Ugu dambeyn, Kooxda Al-shabaab ayaan ka hadlin hadalka sarkaalkan uu ku sheegay in Al-shabaab ay doonayso inay haween adeegsato si ay weerarro uga geystaan gudaha dalka Kenya.

Xildhibaannada kasoo jeeda Amxaarada iyo Oromada ayaa Qaadacay kulanka Baarlamaanka dalka Itoobiya, iyagoo ka careysan rabshadaha u dhexeeya Qowmiyadaha Soomaalida iyo Oromada.

Mudanayaashu waxay sheegayaan inaysan jirin sabab uu Baarlamaanka u kulmo illaa Ra’iisul Wasaare Hailemariam Desalegn uu ka bixinayo sharaxaad ku saabsan qalalaasaha u dheexeeya qowmiyadaha ee dalka ka taagan.

Sidoo kale, Amxaarada iyo Oromada waxay muddo ka dibadbaxayeen waxay ku tilmaameen faquuqa siyaasadeed iyo midka dhaqaale ee ay sheegeen in si gaar ah iyaga loogu hayo.

Muddo bilo ah waxaa socdo dagaal dad badan ay ku dhinteen oo u dhexeeya Qowmiyadaha Soomaalida iyo Oromada. Toddobaadkii lasoo dhaafay ayaa in ka badan 60-qof oo Soomaali ah lagu dilay Gobolka Oromada ee Itoobiya.

Dhanka kale, Arbacadii lasoo dhaafay ayaa Xisbiga EPRDF ee talada wuxuu ku eedeeyay Golihiisa Fulinta inay awoodi waayeen inay rabshadaha dalka taagan ay xal u helaan.

Ra’iisul Wasaaraha dalka Itoobiya, Hailemariam Desalegn oo ka hadlay TV-ga dalkaasi ayaa sheegay in dadka Soomaalida ah lagu laayay gudaha Xero Booliis oo ku taalla Gobolka Oromada.

Inkastoo Desalegn uusan sheegin tirada Soomaalida ah ee la dilay, ayaa la sheegayaa in tirada la laayay ay u dhaw yihiin 100-qof, wuxuuna Desalegn sheegay in dhibaato badan ay ka dhacday goobtaas.

Ugu dambeyn, Ra’iisul Wasaaraha Dalka Itoobiya ayaa xaqiijiyay in guddi loo saaray arrinta si ay u soo baaraan ka dibna wuxuu sheegay in waxa sharciga uu ka qabo lagu qaadi doono kuwa dambiga uu ku cadaado.

Dowlada Sacuudiga ayaa si weyn uga carootay sawiro ay gacanta ku sameeyeen taageerayaasha mid kamid ah kooxaha kubada cagta ee Aljeeriya oo Boqorka Sacuudiga Salmaan la barbardhigay Donald Trump-ka Maraykanka.

Sawiradan oo si weyn dalalka Carabta loogu baahiyey baraha internetka ayey ka carootay xukuumada Sacuudiga oo sheegtay inay jawaab ka bixin doonto arrintan.

Xiisadan ayaa kusoo beegantay xili Isniintii shalay uu dalka Aljeeriya tagay wafdi ka socda Sacuudiga oo uu hogaaminayo Guddoomiyaha Golaha Shuurada Sacuudiga Cabdallah Bin Maxamed Ibrahim al-Sheikh.

Wadanka Sacuudiga oo ah saxiibka ugu weyn ee Maraykanka ku leeyahay dalalka Carabta ayaa lagu eedeenayaa inuu qeyb ka yahay siyaasada qalafsan ee Maraykanka oo ku aadan Bariga Dhexe gaar ahaan qadiyada Falastiin.

Tartankii Guddoomiyaha cusub ee xisbi xaakimka dalka Koonfur Afrika ayaa waxaa ku guuleystay Madaxweyne kuxigeenka hada xilka haya ee Cyril Ramaphosa oo hogaaminayey garabka xisbigaasi ee kasoo horjeeda Madaxweyne Jacob Zuma.

Madaxweynaha Koonfur Afrika Jacob Zuma oo xilka kasii degaya ayaa olole ugu jiray in la doorto Xaaskiisii hore haweenayda Nkosazana Dlamini Zuma oo kamid ahayd xubnaha sare ee xisbiga ANC.

Xiisada ka dhex taagan ANC ayaa laga cabsi qabay inuu burbur ku keeno xisbigaasi oo hada jirsay 105 sano.Madaxweyne Zuma ayaa xilkaasi la damacsanaa xaaskiisa hore oo uu rajeenayo inay ka xijaabto dacwadaha musuq maasuqa ee weli ku socda oo saameyn ku yeelan kara kadib markii uu xilka ka dego.

Ganacsatada waaweyn ee dalkaasi ayaa iyaguna taageersan Madaxweyne kuxigeenka Cyril Ramaphosa oo ah nin ganacsade ah oo ay rajeenayaan inuu wax badan ka bedali doono dhaqaalaha dalkaasi oo hoos usii dhacayey sanadihii lasoo dhaafay.

Dowladda Maraykanka ayaa Codka qayaxan u adeegsatay qaraar ay Masar soo diyaarisay oo ku saabsan go’aanka madaxweyne Donald Trump ee magaalada Qudus,kaasoo la horkeenay Golaha Amniga Qaramada Midoobay.

Qaraarkan qabyo-qoraalka ah oo dhigaya in“waxba kama jiraan” laga soo qaado go’aankii maadxweyne Trump uu Qudus ugu aqoonsaday caasimadda Israa’iil,ayaa waxaa taageeray 14-ka xubnood ee kale Golaha Amniga.

Xubnaha ayaa si wadajir ah u sheegay in xalka Israa’iil iyo Falastiin ku jiro wada-hadal,si loogu guulaysto in ay nabad ka dhalato labada dhinac,waxayna ku baaqeen in la ixtiraamo baaqyada caalamiga ah ku aaddan arrimaha Qudus,inkastoo aysan magacaabin madaxweyne Trump.

Laakiin safiirka dowladda Maraykanka ee Qaramada Midoobay,Nikki Haley ayaa weerar afka ah ku qaadday 14-ka xubnood ee kale Golaha Amniga,waxayna taageeradooda ku tilmaantay“bahdil lama illaawaan ah”.

Haley ayaa tiri”ma aqbalaynno in naloo yeeriyo halka aan safaaradda ka dhiganeyno”.